ნათია კახიძე სტარტაპ გრანტების კონკურსის გამარჯვებულია

ქობულეთში, რუსთაველის ქუჩაზე პატარა სახელოსნოა, სადაც მინანქრის ნამუშევრები იქმნება, მათ შორის, ქართული სახასიათო თემატიკით და საქართველოს მასშტაბით იყიდება.

ნათია პროფესიით ჟურნალისტია. მინანქრის ხელოვნებით წლების წინ დაინტერესდა, აკეთებდა სამკაულებს, თუმცა არ ჰქონდა სპეციალური ღუმელი. პირველი მინანქრის ნიმუში სხვის სახელოსნოში დაამზადა. პირველივე ნამუშევარმა დიდი მოწონება დაიმსახურა და მალევე გაიყიდა. იმის წარმოდგენამ რომ თავისი ხელით შექმნილი ნამუშევარი სხვას დაამშვენებდა, ძალიან გაახარა და გადაწყვიტა ამ საქმისთვის უფრო მეტი დრო დაეთმო.

პანდემიის პერიოდში, სოციალურ ქსელში სტარტაპ გრანტების კონკურსის შესახებ ინფორმაცია იპოვა, განაცხადი გამოგვიგზავნა და გაიმარჯვა კიდეც.

ნათიამ მოგებული გრანტით შეიძინა ნაკეთობათა გამოსაწვავი ღუმელი, გასაპრიალებელი და გრავირების აპარატები. სტარტაპის განსავითარებლად, დემოკრატიის ინსტიტუტის სხვა პროექტშიც ჩაერთო, გაიარა სოციალური მედია მარკეტინგის კურსი, რათა ნამუშევრები უფრო მეტი ადამიანისთვის გაეცნო.

დემოკრატიის ინსტიტუტის გუნდი ნათიას წარმატებებს უსურვებს. მას აქვს მიზანი, მინანქრის ხელობა სხვებსაც ასწავლოს.

პროექტს "უნარები დასაქმებისა და თანამშრომლობისთვის - პერსპექტივები საქართველოს რეგიონებისთვის" (SECTORS), ევროკავშირის დაფინანსებით, "ინოვაციებისა და ცვლილებების ინსტიტუტი", "დემოკრატიის ინსტიტუტთან", საქართველოს ფერმერთა ასოციაციასა და ასოციაცია „ათინათთან“ პარტნიორობით აჭარაში, გურიასა და სამეგრელოში ახორციელებს.